علي رضا اردبيلي: alirza@live.se

صاحيبي معلوم اولمايان ايمضالار و آذربايجان ميللي آزادليق حركاتي

1. آمستردام نائيليتلري كيملري يانديردي؟
2. آمستردام اوغورلاريندان يارانان ناراحاتليغين تظاهورو
3. تاخما آدلار فئنومئني
4. لئقيتيم سببدن ايشلهنن تاخما آدلا يازانلارين 3 موهوم كاراكتري
5. آمستردام دييالوق توپلانتيسي نائيليتي و تاخما آدلارين رولو
6. بايراق ياراداما كامپانيياسيندا خلق اولموش تاخما آدلارين عاقيبتي
7. حساس مسئلهلر
8. موعاليجه يا پرافيلاكتيكا (خستهلييين قاباغين آلماق)
9. حركاتين سيرالاريندا ساغلامليغي قوروماق تدبيرلري
10. "خلوت" يئرده باش وئرن گؤرشون معماسي!
11. سون سؤز


سياسي مسئلهلر و ايجتيماعي حاديثهلر هئچ واخت ساده اولمورلار. بونلار هر زامان موركب و چوخ شاخهلي، پلانلاشميش يا گؤزلهنيلمز، گؤرسنن و گؤرسنمهين اللرين ياراتديغي عمللر، يوكسك اهميتلي و ايكينجي درجهلي مسئلهلرين تركيبي، قيصا و اوزون مودتللي افئكتلرين و بير چوخ باشقا عاميللر و آكتورلارين بيرليكده تظاهور ائتدييي مئيدانا بنزهييرلر. بو قاتيشيق مئيداندا، هر بير سياسي آناليز، بو موركب فضاني، ترسيم ائتمك اوچون يالنيز ان اهميتلي مقاملاري باشا دوشوب، اونلاري، احاطه اولدوقلاري غئيري موهوم مسئلهلردن تجريد ائدندن سونرا موموكون اولا بيلر. باشقا سؤزله اول موركب وضعيتي "تجزيه" ائتمك لازيمدير و سونرا "تحليل".

آمستردام ديالوق توپلانتيسينين دا كئچيريلمهسي و او تاريخدن بوگونه كيمي بو علاقهده باش وئرميش حاديثهلرين اينكيشافي بو قايدادان موستثنا دئيلدير. بو اساسدا توپلانتينين ان اؤنملي ميسياسيني آشاغيداكي كيمي تعريف ائتمك اولار:

آذربايجان ميللي آزادليق حركاتينين سيرالاريندا اولان ايختيلافلاري اؤن پلاندا گئدن فعاليتلرين آراسيندان، آرخا پلاندا جاري اولان نظري-ايدئولوژي موباحيثهلرين اوبيئكتلري سيراسينا كؤچورمك.
بو ايش، يعني آذربايجان ميللي آزادليق حركاتينين سيرلارايندا لازيمسيز موباحيثهلر و قارشيدورمالارين دايانديريلماسي، بو موناسيبتده اساس مسئله و موهوم نائيليتدير. بوگون هويتي معلوم اولمايان موباحيثهلر و قارشيدورمالارين دايانديريلماسي، بو موناسيبتده اساس مسئله و موهوم نائيليتدير. بوگون هويتي معلوم اولمايان گؤلگهيه بنزر آداملار، اؤزونو "گل پسر" (!) كيمي فارس سايتلاريندا عوضو ائتميش شخصلر، ميللي حركاتين وارليغيني و آمستردام دييالوق توپلانتيسينين نائيليتلريني، زهرلي سؤزلرين هدفينه چئويرميشلر. آذربايجان ميللي دموكراتيك حركاتيده اؤز نائيليتلريني قورووماليدير، يوخسا ان بؤيوك نائيليتلرين ده اليميزده قالماغينا بير قارانتي يوخدور. بيزيم ميللتيميزين تاريخي، تاريخي اوغورلارلا دولودور، تأسسوف يارادان بودور كي، اونلارين قدرين بيليب، واختيندا اونلاري قورويا بيلمهميشيك. سياسي نائيليت بير "وضعيت" دئيل كي اونا چاتيب، اوردا قالماغا قارانتي آلاسان. سياسي اينكيشاف، هميشه بير "پراسئس"دير. يعني اونو يئنيلشديرمهسن، تكرارلاماسان و قورويا بيلمهسن، داها او سنين اولماياجاقدير.

 


1. آمستردام نائيليتلري كيملري يانديردي؟
حتي دموكراتيك حاكميتلر و حتي دموكراتيك نظارت آلتيندا فعاليت ائدن رئژيملر، اؤز ايقتيدارلاريني افئكتيو و آز هزينهايله اعمال ائتمك اوچون، توپلوم داخيلي قوهلرين آراسيندا اولان قارشيدورمادان يارارلانيرلار. چوخ زامانلار حتي مئديا اورقانلاريندا، ميثال اوچون بير دئبات پروقراميندا، موختليف و ضيديتلي فيكير صاحيبلريندن عيبارت پانل ايشتيراكچيلاري، آپاريجي ژورناليستين ايشيني راحاتلاشديديرير و اونون ايقتيداريني سؤزسوز ائدير.

بو باخيمدان فارس دؤولتچيليييني تمثيل ائدن ايران ايسلام جومهوريتيني حتي دموكراتيك بير رئژيم حئساب ائتسكده، اونون ايقتيداريني تأمين ائدن، آذربايجان ميللي آزادليق حركاتينين ائنرژيسينين، حركاتين موختليف قوللارينين بير-بيرلريله قارشي دورمالاردا دئشارژ اولماسيدير. بوحاقدا گئنيش دونيا تجروبهسي واردير. هم غربين دمكراتيك اؤلكهلرينده و همده دونيانين آوتوريتر رئژيملرينين تاريخلري، بو اقتيدارلارين اؤز موخاليفلرينين سيرالاريندا، دائمي قارشيدورما وضعيتيني ساخلاماق فاكتلاريلا دولودور. او جوملهدن آمئريكا بيرلشميش اشتاتلاريندا، آغ و قارا راديكال قوهلريني كونترول ائتمك مقصديله، اف.بي.آي. و ديگر دؤولت اورقانلارينين بو قارشيدورماني ياراتماق، اونو دائميلشديرمك و اوندان ايستيفاده ائتمك حاللارينا هم بول-بول راست گلمك اولور و هم اوردا دؤولت دايرهلرينه موعين درجهده اعمال اولان دموكراتيك نظارتين عوجوباتيندان، سندلري الده دير. (بو مسئله گئنيش و اهميتلي اولدوغونا گؤره، موستقيل بير مقالهيه ائحتياجي واردير.)

دئمهلي اگر ايران رئژيمينين منافعيني تأمين ائدن آذربايجان ميللي آزادليق حركاتينين داخيلينده اولان قوهلرين بير-بيرلرينه قارشي ائنرژيلرينين دئشارژي حئساب ائتسك، اوندا، آمستردامدا الده اولان نائيليت يعني 12 بندليك بير سياسي و تاريخي بياناتدا بئله لزوومسيز داخيلي قارشيدورمانين گوندهليكدن چيخارماغا بارماق قويماق، بيزيم خئيريميزه اولمايان بير تارازليغي پوزوب و بو تارازليقدان فايدالانان ايران رئژيمينين بيزه قارشي فعاليتده اولان اورقانلارين برك ناراضي سالميشدير.

2. آمستردام دييالوق توپلانتيسينين اوغورلا كئچيريلمهسيندن يارانان ناراحاتليغين تظاهورو
ماراخليدير كي آمستردام توپلانتيسي عرفهسينده عصبي بيانات وئريب و او توپلانتيدا "ايفشاچيليق" ائدهجكلري حاقدا رجز اوخوماغين شاهيدي اولدوقسا، آمستردام توپلانتيسيندان سونرا ماهيتي شوبهه آلتيندا اولان بير سايتدان سواي، بو قووهلرين سوسماق دؤورونو ياشاديق. ميثال نامناسيب نظره گلسهده، اونلارين طرفيندن طاليبان رئژيمينين آمئريكا قوشونلارينين افغانيستانا هوجومو قارشيسيندا آپارديقلاري آشاغيداكي تاكتيكلرين ايشلنمهسينه شاهيدي اولدوق:
حربي عملياتدان اؤنجه: رجز اوخوماق
حربي عمليات جرياندا اولاركن: اوز-به-اوز توققوشمادان ايمتيناع ائتمك
حربي مغلوبيتدن سونرا: سوكوت ائديب، وضعيتي اؤيرنمك و ضربه ائنديرمك اوچون مقصدلر آراماق
سوكوت دؤروندن سونرا: پراكنده عملياتا كئچمك
بيز آمستردام توپلانتيسينا قارشيدا بو 4 مرحلهلي تاكتيكالارين 3 مرحلهسينين شاهيدي اولموشدوق و ايندي 4-جي ائتاپدا، امامي زمانين آدسيز و هويتسيز قوشونو پراكنده عملياتا كئچيبدير.

3. تاخما آدلار فئنومئني
صاحيبي معلوم اولان تاخما آدلار مسئلهسي، بام باشقا بير فئنومندير. بو آدلار اصلينده ادبيات و شعر عالمينده مرسوم اولان تخلص كيميدير. يعني هامي "فضولي"، "صراف"، "اوختاي" "گوهرمراد" يا "ساپلاق" كيمي آدلارين كيمه عاييد اولدوغونو بيلير و بو مسئله منيم آچديغيم موباحيثهيه داخيل دئيلدير.

تعريف: متمدن بير دونيانين مدنيتلي وطنداشلاري اوچون اونلارين آدلاريدا، ديللري و ميللي منسوبيتلري كيمي، اونلارين كيمليكلرينين (هويتلرينين) بير حيصهسيدير. آمما بو مسئلهنين ده بير "اما"سي وار: غئيري متمدن آوتوريتر دؤولتلر قارشيسيندا چاليشان اينسانلار اوچون، چوخ واختلار اؤز كيمليكلريني بللي ائتمك، صرف ائتمير. بو حالدا تاخما (مستعار) آد فئنومئني پيدا اولور و بونونلا ميثال اوچون، اصلينده "رحيم جمالي" اولان شخص، "كوراوغلو" ايمضاسيلا مطلب يازير يا "كوراوغولونون دليلري" تهلوكه آلتيندا گيزلي فعاليت ائدن بير قوروپ اينسانلارين اؤزلرينه سئچديكلري آد كيمي ايستيفاده اولونور. بو ايش تام آنلاشيلان و لئقيتيم بير ايش دير. آمما مسئله بونولا بيتمير و ايران رئژيمينين موختليف اورقانلاريدا بوردا بئكار قالماييرلار.

4. لئقيتيم سببدن ايشلهنن تاخما آدلا يازانلارين 3 موهوم كاراكتري
بير. اونلار هرگون بير آد سئچميرلر و اونلارين تاخما آدلاريدا اونلارين سياست و قلم عالميندهكي، ياراديجيليقلارينين آيريلماز بير حيصهسينه چئوريرلير و بو يئني ايمضالار ايللر بويو، يازيلي مئدياميزدا گؤزه دهييرلر. بو دوامليليق، بو تاخما آدلارا لازيملي بير اعتيبار وئرير.

ايكي. خاريجده فعاليت ائدن ميللي اينسانلارين بو تاخما آدا صاحبلريله دائمي علاقهلري و فيكير آليش-وئريشلري واردير و شخصي تانيشليق اساسيندا، خاريجده كي ميللي اينسانلار، محدود بير سويهده اونلاري تانيرلار. بو تانيش ليق اساسيندا، لازيم گلدييي حالدا بو خاريجده ياشايان و داخيله موسافيرت ائتمهين اعتيبارلي شخصلر، بو تاخما آد صاحيبلرينين ميللي فعال اولماسيني تصديق ائده بيلرلر.

اوچ. تاخما آدلارلا يازانلارين سايي اصلينده چوخ آزدير. داخيلده ياشايان مينلرله قلم و فيكير صاحيبي اولان اينسانلاريميز، بو مسئلهلري گؤتور-قوي ائدندن سونرا، اؤز اصلي آدلاريلا يازيرلار، ايمضا وئريرلر و تانينيرلار، ظولمون محكمهلري قارشيسيندا دورورلار و ظولمون دوستاغينا دؤزورلر. و بيز هر يوز و يا بلكه مين صاحيبي معلوم اولان ايمضا قارشيسيندا،بير تاخما آدلا يازيلان مقاله و اثرلرين شاهيديييك. بو حالدا، تام طبيعيديركي، بو يوزده بير اولان حيصهنين نشر ائئتدييي اثرلر، او صاحيبي معلوم اولان 99 فاييزين يازيلاريندان فرقلي اولماسين. ميثال اوچون اگر صاحيبي معلوم اولان فردي و جمعي ايمضالارلا نشر اولان يازيلاردا، دييالوق توپلانتيسي موثبت قارشيلانير، بو ايشين، صاحيبي نامعلوم تاخما آدلار طرفيندن هجوما معروض قالماسي، تام غئيري طبيعي و آنلاشيلماز ساييلماليدير.

5. آمستردام دييالوق توپلانتيسي نائيليتي و تاخما آدلارين رولو
كيمليكلري معلوم اولان ميللي فعاللار و صاحيبلري معلوم اولان ايمضالارلا، صاحيبي نامعلوم ايمضالارين، بو توپلانتينين كئچيريلمهسي و نتيجهلرينه موناسيبتلرينه بير نظر سالاق:
توپلانتي قاباغي "امير م." آدلي بير جناب، گويا آمسترداما تشريف بويورب، اوردا، ايفشاچيليق ائدهجهيي حاقدا "باي بك" سايتيندا فارس ديلينده مطلب نشر ائتميشدي. آيا بو "هل من مبارز" باغيران شخص آمستردامدا اولدو؟ اونون ايفشا ائتديكلري سيرلار نه لر اولدو؟ اونو كيمسه گؤردو؟ ايندي يوخاريدا ايشاره ائتديييم طاليبان ميثالي ساياغي، آمستردام توپلانتيسيندان سونرا، اوردا يارانميش بيرلييين تركيب حيصهلريني موطاليعه اوبيئكتي ائتميش، نئچه تاخما آد صاحيبلري، بير هفته ايچينده ديل آچيب و ايشه كئچميشلر. اونلار آمستردام توپلانتيسينا بير باشا توخونوب-توخونمامالاريندان آسيلي اولماياراق، بو توپلانتينين مضمونو يعني آذربايجان ميللي آزادليق حركاتينين داخيلينده ساغلام و موثبت بير آتموسفرين قورونماسينا قارشي نيفرتلي كامپانيايا باشلاميشديرلار. بونلارين، اؤنجه تاخما آدلا آمستردام توپلانتيسينا قارشي نئقاتيو يازيلار يايانلارلا بيرليكده آدلاري بئلهدير:

"امير م." (فارس ديلينده) (قوقول آختاريش موتوروندا يالنيز آمستردام دييالوق توپلانتيسيندان اؤنجه، توپلانتينين آتموسفريني مسموم ائتمك مقصديله حاضيرلانميش يازيدا ايستيفاده اولونموش آد)
"يازار قاراباغلي" (قوقول آختاريش موتوروندا يالنيز آمستردام دييالوق توپلانتيسينين نائيليتلرينه قارشي اولان يازيدا ايستيفاده اولونموش آد)
"بوزقورت رامين"، (فارس ديلينده) (قوقول آختاريش موتوروندا يالنيز آمستردام دييالوق توپلانتيسينين نائيليتلرينه قارشي اولان يازيدا سون هفته ده مئيدانا آتيلميش آد).
"مارال مجيدي تبريزي"، (يالنيز بير سطير توركجه شوعار يازيبدير ) (قوقول آختاريش موتوروندا بير يئرده ده تاپيلمير. يالنيز آمستردام دييالوق توپلانتيسينين نائيليتلرينه قارشي اولان اي مئيلده سون هفته ده مئيدانا آتيلميش آد)
"تورك اوغوز"، (فارس ديلينده) (قوقول آختاريش موتوروندا، آمستردام دييالوق توپلانتيسينين نائيليتلرينه قارشي اولان يازيلاردا ايستيفاده اولونموش و بير فارس سايتيندا "گل پسر 444" كيمي ثبت اولموش آد)
"گونئي توران توران"، (فارس ديلينده) (قوقول آختاريش موتوروندا تاپيلمير و يالنيز آمستردام دييالوق توپلانتيسينين نائيليتلرينه قارشي اولان اي مئيلده، سون هفته ده مئيدانا آتيلميش آد)

ايندي يوخاريدا ايشاره اولان تاخما آدلا يازانلارين 3 موهوم كاراكترلريني بو 6 ايمضادا آختاراق:

بير. دواملي ايستفاده اولان تاخما آد: بو باخيمدان بو 6 تاخما آدلاري حتي قوقول آختاريش موتوروايله بئله تاپماق موموكون دئيلدير. بونلاردان يالنيز "تورك اوغوز" آديني بير فارس ديللي كلوبون عوضوي كيمي تاپماق اولور. اوردا اولان معلومات دا بو ايمضا ايله يازيلميش يازيلار حاقدا بير سؤز سؤيلهمير. او معلومات بئلهدير: "مرد30 ساله مجرد،
somebody from neverland، اوغوز تورک 4 ماه پیش فریاد زد!!! آذربايجان" او سايتين آدرسي بئلهدير: http://www.cloob.com/name/golpesar444 بوردان معلوم اولمور كي بو "نئوئرلندلي، مرد 30 سال مجرد" (!) آمما سايتن بو "اوغوز تورك" جنابينا عاييد اولان صحيفهسيني آدرسيندن معلوم اولور كي، او بي بو كلوبدا 444 نؤمرهلي عوضو و "گل پسر"(!) كيمي ثبت اولموشدور. همان فارس ديلينده بير چوخ آذربايجانلييا قارشي يازيلميش توهين و تحقير دولو يازينين مؤلفيدير يا يوخ؟ قالان 5 ايمضادان دا بير يئرده اسيتيفاده اولدوغو قوقول آختاريش موتوروندا معلوم اولمور.

ايكي. خاريجده ياشايان و داخيله مسافرت ائتمهين آزي بير ميلل فعالين بو ايمضالارين صاحيبلرينين يالنيش فيكيرلري اولسالاردا، "ميللي فعال" يا ان آزي "ميللي حيسسياتلي ساغلام شخص" اولماسيني تصديق ائتمهسي. آيا خاريجده كي ميللي فعاللاردان كه ايران ايسلام جومهوريتينه موسافيرت اونلارا نصيب اولمور، حتي بير نفر قدم ايرهلي قويوب تصديق ائده بيلر كي، فارس ديللي "اثر"لر صاحيبي اولان "امير م."، "بوزقورت رامين"، ، "تورك اوغوز" و "گونئي توران توران" يا توركجه بير سطير اهانتلي سؤزلرين مؤلفي اولان
"مارال مجيدي تبريزي"، ايران رئژيمينين آرا قاتان اللري يوخ، ساغلام فيكير صاحيبي اولماسالار دا بئله، رئژيمه باغلي اولمايان آذربايجانلي ديرلار؟

اوچ. ماهيتلري معلوم اولان ميللي فعاللارين ايفاده ائتديكلري فيكيرلرينه بنزرليك: آمستردام توپلانتيسيندا 300 نفر اينسان حاضير اولموشدورلار. داها آرتيق ساييدا اينسانلار سسلريله گونآذ تي وي واسيطهسيله بو حاقدا فيكيرلريني بيلديرميشديرلر. اينترنت سايتلاريندا دا موستقيل مطلب و يا مقالهلرين اتهيينده وئريلن كامنتلرده ده بير چوخ فيكيرلر سؤيلنيلميشدير. هابئله آمستردام دييالوق توپلانتيسيلا بير باشا باغلي اولماسادا، آذربايجانلي تشكيلاتلار و ميللي آزادليق حركاتينين سيرالاريندا فعاليت ائدنلرين سياسي فيكيرلرينه قارشي تنقيد و تأييدله باغلي يازيلميش مينلرله يازي و مينلرله حضوري يا مئديال ايفادهايله موقاييسهده، طبيعي بو اولاردي كي، بو 6 نامعلوم عسگرين فيكيرلري، اؤز فيكيرلريني آدلاري و سسلريله سؤيلهين اينسانلارين دئديكلري و يازديقلاريندان چوخ فرقلي اولماسين. آمما يوزلرله ايفاده اولموش فيكيرلرين آراسيندا بو 6 ايمضاني داشييان "اثر"لر اؤز نئقاتيو اولمالاري و ("يازار قاباغلي"نين يازيسيني موستثنا ائتمكله) نيفرت دولو مضمونلاريلا سئچيليرلر. بوردا ايكي ائحتيمال واردير:

بير: يازارلارين كيملييينين گيزلي ساخلانيلماسي، يالنيز رئژيمين غضبيندن قورونماق مقصدي داشير.

ايكي: كامپانيانين مضمونو و خيدمت ائتدييي مقصد ائلهدير كي، بو پروژهنين عاميللري اؤز كيمليكلريني بيان ائتمهيي مصلحت گؤرمورلر، ايستر بو عاميللر رژيمين خيدمتينده اولسون ايستر يوخ.

بيرينجي آلترناتيوده. طبيعي بو اولاردي كي، اصلينده اوزونو رئژيمين غضبيندن قوروماق ايستهين بو 6 نفرين فيكيرلري، ائله او يوزلر و حتي مينلر نفر اوز فيكيرلريني اؤز كيمليكلريله بيان ائتميش زومرهنين فيكيرلرينه بنزهيردي. دئمهلي ايكينجي آلترناتيو يعني كامپانيانين آذربايجان ميللي حركاتي سيرالاريندا نيفرت و عداوت كؤكلريني اكمك مقصدي، بو قوندارما آدلارين مئيدانا چيخماسينا سبب اولموشدور.

بوگونه كيمي آمستردام دييالوق توپلانتيسي حاقدا و بو توپلانتينين دستكلهدييي ايشبيرلييي و دوستلوق روحونا قارشي اولان نئقاتيو مطلب يوخاريدا كي 6 نامعلوم ايمضا و رژيمين تبليغات اورقانلارينا بنزهين "باي بك" سايتينين مودورو طرفيندن باش وئرميشدير. بو 6 نامعلوم عسگرين "اثر"لري ده، اگر ايمئيل قوروپلاريندا ياييلماميشلارسا، اوندا ائله بو معلوم سايت واسيطهسيله عياني اولموشدورلار.

6. بايراق ياراداما كامپانيياسيندا خلق اولموش تاخما آدلارين عاقيبتي
ماراخلي بودور كي، بير زامان اؤنجه آذربايجان آدينا يئني بير بايراق يارادماقلا، ميللتيميزي گولونج وضعيته سالماق كامپانياسي دا، ائله بير دفعهليك (يكبار مصرف) تاخما ايمضالارلارين هرطرفلي موداخيلهسيله، حياتا كئچميشدير. او زامانكي قوندارما ايمضالار، حتي او كامپانيا دايانديقدان سونرا بئله، بير يئرده تظاهور ائتمهميشلر. بو آدلارين سياهيسينا بير ديقت ائدين:

آيتان ار اوغلو (قوقول آختاريش موتوروندا يالنيز بايراق يارادماقلا علاقهدار يازيلاردا ايستيفاده اولونموش آد)
آنار ائلين (قوقول آختاريش موتوروندا يالنيز بايراق يارادماقلا علاقهدار يازيلاردا ايستيفاده اولونموش آد)
خزر گؤنئیلی (قوقول آختاريش موتوروندا يالنيز بايراق يارادماقلا علاقهدار يازيلاردا ايستيفاده اولونموش آد)
قزيلباش بؤروسوي (قوقول آختاريش موتوروندا يالنيز بايراق يارادماقلا علاقهدار يازيلاردا ايستيفاده اولونموش آد)
يوکسل اؤزنآي (قوقول آختاريش موتوروندا يالنيز بايراق يارادماقلا علاقهدار يازيلاردا ايستيفاده اولونموش آد)
ائلشن گؤنئيلي (فارس ديلينده) (قوقول آختاريش موتوروندا يالنيز بايراق يارادماقلا علاقهدار يازيلاردا ايستيفاده اولونموش آد)
بابک آذربايجانلي (فارس ديلينده) (قوقول آختاريش موتوروندا يالنيز بايراق يارادماقلا علاقهدار يازيلاردا ايستيفاده اولونموش آد)
حسين قاراقانلي (فارس ديلينده) (قوقول آختاريش موتوروندا يالنيز بايراق يارادماقلا علاقهدار يازيلاردا ايستيفاده اولونموش آد)

بير يئرينده اولان سوآل بودر: اگر بو قوندارما آدلار، اوزونو رئژيمدن قوروماق ايستهين بير سيرا ميللي فعالا منسوبدورلار، بس نه دن بونلار بير كامپانيا ايله ايشه دوشوب و او كامپانياايله باتيرلار؟! طبيعي بو اولمازدي كي بئله ميللي فعاللار، هم كامپانيادان اؤنجه فعال اولوردولار و هم كامپانيادان سونرا فعال قاليرديلار؟ بونلار نئچه فيكير صاحيبلريديرلر كي، يالنيز بير قيصا زامان بؤلومونده و بير كامپانيا چرچيوهسينده، آكتيو اولوب سونرا سوسورلار؟

7. حساس مسئلهلر
 بلكه ائله بو مقالهنين اولينده قئيد ائتمهلييديم كي، بوتون بو سؤزلر يالنيز "حساس مؤوضوعلار" و بو مؤوضوعلاردا قلم وورانلارا عاييددير. يوخسا بديعي ادبيات، ادبي آراشديرمالار، موباحيثهسيز تاريخي آراشديرمالار و بو مؤوضوعلاردا فيكير سؤيلهمك هر بير ايمضا و هر بير كيفيتله منيم بو مقالهمين شمولوندان كناردا قالير.

آمما حساس مسئلهلر منيم باخيميندان او مؤوضوعلارديرلار كي، آذربايجان ميللي آزادليق حركاتينين سيرالاريندا موباحيثهلي ديرلر و ايختيلاف ياراديرلار. موباحيثهلي مسئلهلرين سياهيسي زامانلا فرق ائدير و بوگونون موباحيثهلي مسئلهسي باشقا بير زامان بؤلومونده تام بيرمعنالي قبول اولماسادا، اوزون-اوزادي موباحيثهلر ياراتمير. بوگونون موباحيثهلي مسئلهلرينه ميثال كيمي، آشاغيداكي مسئلهلري سادالاماق اولار:
اؤتن ايلينن پريزيدنتت سئچگيلريندن سونرا اساساً تهراندا باش وئرن (باش وئرميش؟) رژيمه قارشي حركاتا موناسيبت.

فدراليسم و ايستيقلال
قونشو تورك دؤلتلرينه موناسيبت
تشكيلاتلارين سياست و تاكتيكالاري
ميثال اوچون ايشاره اولان بو مسئلهلرين هاميسيندا ايران ايسلام جومهوريتينين رسمي سياستي وار و تام طبيعي حئساب اولماليدير كي، ايران رئژيمي رسمي، غئيري رسمي، آچيق، گيزلي و ديگر هر بير مئتدودلا بو حاقدا اؤز سياستيني بيزيم آراميزدا ايرهلي سورمك ايستير. داهادا موهوم بير فاكت دا بودور كي، رئژيم اؤزونون آچيق ايمكانلاري و اؤز ايمضاسيلا هر بير مؤوضوعدا فيكير سؤيلهسه، اونون ايستهدييي نتيجهني وئرميهجكدير و بودا، رئژيمي، حميد امير احمدي كيمي اوزدن ايراق "عالم" و "علمي آراشديرماچي"لار آدلانديرديغي شخصلرين ديليندن، ماسكا آرخاسيندان، ميللي فعال مؤوقيندن، تاخما آدلارين آلتيندا، ميللي حركته نوفوذ ائتميش آداملارين واسيطهسيله و اصلينده ميللي حركاتدان اولان آمما موعين سببلردن، رئژيمه بويون ايمهيه مجبور قالان اينسانلارين واسيطهسيله بيان ائدير.

8. موعاليجه يا پرافيلاكتيكا (خستهلييين قاباغين آلماق)
رئژيملرين بو نؤوع فعاليتلري يالنيز موستثنا حاللاردا سندلي حالدا معولوم اولور و نئجه دييرلر مسئله آي ايشيغينا دوشور و بيز حتي شاه و سووئت رئژيملريني دئوريلديكلريندن سونرا بئله، اونلارين بو تيپلي عملياتلاريندان سندلشميش خبرلر الده ائتمهديك. بو باخيمدان بيزيم بو نؤوع عملياتلارا قارشي ميللي آزادليق حركاتينين ساغلامليغيني قوروماق، معالجه يوخ، خستهلييين قاباغين آلماق (پرافيلاكتيك) كاراكتيرلي اولماليدير. يعني اكثر حاللاردا بيز ميكروبلاري و ويروسلاري گؤرموروك آمما تجروبه اساسيندا اونلارين اولماسي محتمل محيطلر و مقاملاردا، حركاتين سيرالاريني آلوده اولماقدا قوروماغا چاليشيريق.

9. حركاتين سيرالاريندا ساغلامليغي قوروماق تدبيرلري
بير:
بيز بو ايشي هميشه غريزي اولاراق، ائديريك. آمما يئري گلميشكن، مقالهنين مؤوضوعسونا عاييد اولان بير نئچه تدبيرين آديني چكمك ياخشي اولار.

ايكي: تاخما آددان ايستيفاده ائتمهيه مجبور اولان دوستلار، هرگون وهر مؤوضوع اوچون بير آد يوخ، دواملي اولاراق، بير آددان ايستيفاده ائده بيلرلر. بو حالدا هما بو مستعار آدلارين اعتيباري آرتار و هم رئژيم، چوخ ساييلي تاخما آدلاردان يارنميش جنگل مؤولادان اؤز عملياتينا اؤرتوك كيمي ايستيفاده ائده بيلمز.
اوچ: حقيقي كيمليكلري معلوم اولان و تاخما آدلارينا اعتيبار قازانميش قلم صاحيبلري، بير دفعهليك و خلقالساعه و اعتيبارسيز ايمضالارلا اويدورولموش هيجانلي موباحيثهلره اعتيناسيز قالسينلار.

دؤرد: آپاريلان موباحيثهلرده، اگر تانينميش ايمضالارلا يازيليب و نشر اولان فيكيرلردن عيبارت طيفلرين تركيبي، اعتيبارسيز ايمضالارين موافيق تركيبيندن جيددي حالدافرقلنير، هامي آييق-ساييق اولوب بو فرقين غئيري طبيعي اولدوغونو وورغولاماليدير. اگر ميثال اوچون تانينميش ايمضالاردان يوزه 90 نفر، بير فيكيردهدير هئچ بير سبب يوخدور كي، تاخما و غئيري معتبر ايمضالارين محصوللاريندا، بو همين رقم 90 يئرينه 20 يا 10 اولسون. بئله حالدا خصوصيله اگر مؤوضوع حسادير و رئژيمين بو حاقدا سياستي وار، جيددي شوبهه يئري وار كي، ميللي حركاتين خاريجيندن بير قووه (ايران رئژيمي) اؤز فيكريني بو تاخما آدلارين آلتيندا آپارديغي كامپانياايله، حركاتي مسموم ائتمك ايستير.

بئش: وارليقلاري آنجاق اينترنت سايتيندا مؤوجود اولان "تشكيلات"لارا ائحتياطلا ياناشماق لازيمدير. بو ويرتوئل وارليقلارين حاقيندا قضاوت ائتمك اوچون علمي غيبدن بهره سي اولمايانلارين هئچ بير ايمكانلاري يوخدور.

آلتي: موراجيعتلر و آچيق مكتوبلارا ايمضا توپالايان ديرلي دوستلار ديقت ائتمهليديرلر كي، ان آزي ايلكين ايمضالار توپلاناركن، تاخما آد و قوندارما ايمضالار (فرد يا قوروپا منسوب اولمالاريندان آسيلي اولماياراق) سون درجه نئقاتيو و ايشين جيدديلييينه خلل گتيرن بير ايشدير. بو ايشله، حتي حقيقي آدلارين ايمضالاري اعتيباردان دوشور و بو مهوم فعاليت نؤوعيني، ديردن و افئكتدن سالماق اوچون بيزه قارشي اولان قووهلر چوخ راحاتجاسينا بو مسئلهدن ايستيفاده ائده بيلرلر. باشقا مسئله بودور كي، بئله ايمضا توپالاماق كامپانيالاريندا قوندارما، "بير دفعه ليك" ايمضالارا يئر وئمكله، حركاتين سيرالاريندا تخريبات قووهلرينين بئجرمهسينه زمين يارادميش اولوروق. يعني او اويدورما آدلارين، بير ايمضا توپالاماق كامپانياسيندا بيرباشا و درحال نئقاتيو رولو اولماسادا، همين ايمضا توپلاماق كامپانياسيني، صاحيبلري نامعلوم اولان تاخما آدلارين يارانماق و لانسه ائتمك كامپانياسينا چئوريلمهسي هئچ دوزگون ايش ساييلا بيلمز. منجه حتي بئله كامپانيالاردا، ايمضا وئرن شخصين ياشاديغي شهرين آدي و اي مئيل آدرسينين وئريلمهسيني ضروري اعلان ائتمك اولار.
.


10. "خلوت" يئرده باش وئرن گؤرشون معماسي!
آشاغيدا "تورك اوغوز" ايمضاسيلا يازيلميش كامپانيا ماترياليندان بير سيرا ايفادهلري نقل ائديرم. اگر بو شخص آذربايجان دوشمنلرينه قارشي يازديغي بير يازي يازميش اولسايدي، موقاييسه ائتمك اولاردي كي، او دوشمنه داها سرت دير يا آذربايجانليلارا.
"...بي‌شرمي سياسي و ابتذال
حيله‌گري سياسي
با بي‌حيايي سياسي که مختص پان‌ايرانيست‌هاي جاعل هست
شعبده‌بازان
پان‌ايرانيست
براي
آقاياني که فقط از فرکانس ايران‌گرايي شنوايي دارند،
اين مشاطه‌‌هاي سياسي
نويسندگان اين بيانيه که با به مسخره گرفتن
حرکت ملي آزربايجان جنوبي
اين بيانيه
ظاهرفريب براي چندمين و چندمين باردر تاريخ اخير مبارزان آزربايجان جنوبي را به در ارباب بي مروت
چنين ژاژ خاييده‌اند که
بهره‌گیری از ادبیات
باستان‌گرایانه و تمامیت‌خواه که آبشخوری در گرایشات ناقض حقوق بشر و سرکوب دموکراسی
اول
با يک عشوه مخصوص
گدايي بر در جنبش سبز و رهبران فرهيخته
ايران‌محوري، خودکم‌بيني ملي، و استيسال سياسي
آنان از اشغالگران آزربايجان (حمايت) ميطلبند
آنان از دشمنان تورک و زبان
تورکي به (زبان ترکي) (رسميت) گدايي ميکنند
اين
ايران‌مداران‌ و دايناسورهاي سياسي که تنها هدفشان سوار شدن بر گرده حرکت ملي آزربايجان، مهار آن، و انحراف آن بطرف فارسستان است،
اين دشمنان آزربايجان جنوبي که خود را به لباس (جمعی از فعالین ملی و مدافعین حقوق مردم آذربایجان) ملبس نموده‌اند
اين بيانيه و امثالهم در خدمت خنثي سازي مبارزان
ملي آزربايجان است..."

بو "مرد 30 ساله مجرد" و "گل پسر" (!) (اگر ايكي "تورك اوغوز" وارسا قوي اؤزلري يازسينلار) نيفرتنامهسينين بير يئرينده آشاغيداكي اديعاني ائدير:

"آنان وقتي با شياطين خود يعني
طبقه حاکمه ايران، چه در حکومت و چه در مخالفت، خلوت ميکنندبه آنان قول کنترل، فرونشاندن و اهلي کردن مبارزان آزربايجان تجزيه‌طلبان را ميدهند. که چند جوان که از جمهوري آزربايجان و ترکيه و اسرائيل و در يک کلمه از استکبار جهاني پول ميگيرند هواي ناساز جدايي از مام وطن کرده‌اند، که... "

معلوم دئيل كي بو جناب، او "خلوت" يئره نئجه يول تاپير: نيفرت ياغديرديغي اينسانلارين تركيبينده يا "طبقه حاکمه ايران"لا بيرليكده؟!

اگر بو جناب ين بو مودعايه سندي وارسا، قوي اون نشر ائتسين، اگر بو بويدا سؤزي سندسيز دئير اوندا هم بو جناب ين اؤز و و هم اونون يازيلاريني نشر ائدن هر بير شخص يا اورقانين، ميللي حركاتين سيرالاريندا بير دوستو و مودافعي اولماماليدير.



11. سون سؤز
اگر تاخما آددان ايستفاده ائتمك، كونكرت شراييطده قاچيلماز بير ايمكان ديرسا، بو ايمكاندان سوء ايستيفاده ائتمهيه قارشي آييق-ساييق اولماق دا چوخ اهميتلي بير ايشدير. هر بيولوژي وارليغين اوزونو مودافيعه مئخانيزماسي اولدوغو كيمي، بير ميللي و سياسي حركاتيندا، اؤزونو ساغلاملاشديرما و مودافيعه مئخانيزمي چوخ آكتيو و چوخ افئكتيو اولماليدير. (يوخاريدا ايشاره اولدوغو كيمي) بو پراسئس چوخ واخت، سببلري ثبوت اولموش خستهلييي معالجه ائتمك كيمي يوخ، ائحتيمال اولونان آلودهليكلرين واختيندا قاباغيني آلماق كيمي پرافلاكتيك تدبيرلر فورموندا اولماليديرلار.

داخيلده رئژيمين باسقيسي آلتيندا اؤز آدلاريلا بيانات وئرن ضياليلارا خاريجدن نيفرت كامپانياسي آپارنالارين تاخما آددان ايستيفاده ائتمهلرينين هر سببي اولورسا، اؤزلريني رئژيمدن قوروماق دئيلدير.