آذربايجان خالقينين ميلي ايستکلر يولوندا 29- بهمن عوصياني حاقيندا

ياشار گولشن

1356 - نجي ايلين بهمن آيينين 29 ايندا آذربايجان خالقينين چوخدان آرزو سونو چکدي يي فورصت گليب چاتدي. اوزون ايللردن بري ايقتيصادي و فرهنگي تضييق آلتيندا ياشايان خالق، بوگون اؤز اينتيقامينين پهلوي رژيميندن آلماقا ايمکان الده ائتدي .

1357- نجي ايلين 22 - بهمن اينقلابي نين يارانماسي موختليف تفسير لر له شرح ائديلير . ايسلام حاکيميتي رسمي لرينين طرفيندن تبليغ ائديلن سياست، 22 - بهمن اينقلابينين اساس سببيني هميشه 1356- نجي ايلين دئي آيينين 19 ايندا قوم طلبه لرين نماييش لريله باغلي تانيير . ديگر طرفدن غير ديني قووه لر، بو غاليبيتي باشقا حاديثه لر له باغلاييرلار . نمونه اولاراق سول قووه لر بو غاليبيتي 1356 - نجي ايلين يايدا باش وئرن حاديثه لريله ايلگي گورور . اونلار اينقيلابين ايلک حرکاتيني بلديه ايداره سي طرفيندن زحمتکش لرين جاواز سيز تيکديي ائولرين داغيلماسينا قارشي توقوشما لاردا گورورلر . باشقا طرفدن بعضي لري 1356 - نجي ايلين ياييندا يازارلار بيرلينين اون گونلوک توپلانيشيندا گئچيريلن نوماييش لري، 22 - بهمن اينقلابينين باشلاييش نوقطه سيني حئساب ائديرلر. اوزلريني ايتيرميش بعضي لرده، خالق قووه سيني اصلا نظره آلمادان ، بشر حقوقلاريني اؤنه چکره ک ، امريکا پرئزيدنتي کارترين ايشه باشلاماسي ايله دويون ليير .

البته کي بونلارين هئچ بيريسيني نظردن قاچيرماق اولماز ، لاکين درين و ديقتله باخيلارسا ، سادالانان اولايلار هئچ بيري اوز صينفي دايره سيندن کنارا چيخا بيلمه ميش ، سسلري ايسه گور ائشيديله بيلمه ميشدير .اساس حرکات کي عموم اهالي عوصيان شه کيلده اوندا ايشتراک ائتدي و رژيمين بينؤوره سين تيترتدي ، هئچ شوبهه سيز کي تبريز عوصياني اولدو . بو عوصيان آذربايجان نين موعاصير تاريخينده 29 بهمن آديله داخيل اولدو .

اوگون تبريز ده تورک لرين ديني مرجعي سيد کاظيم شريعتمدارينين وئردي يي اعلانا گؤره، قوم شهرينده نئچه طلبه نين گوله لنمه سينه گؤره بير ياس مراسمي پلان لاشميشدي . بو گئديشين ان نهايي نتيجه سي بازارين تعطيلي و ساده بير ياس مراسيمي کئچيرلمه سي نظره ده توتولوردو . اوگون ساعت 9 - دا ، مسجيده توپلاشانلارلا رئژيمين مامورلاري آراسيندا بير توققوشما باشلادي . بير پليس افسري آتش آچيب بير نفري آتشه توتوب اولدوردو . بونو باهانا ائدن خالق، 31 ايلليک جينايته سون قويماق اوچون حرکته گلدي . رئژيمين بوتون حياتي اورقانلاري ، کلانتري لر ، بانگ لار ، دولتي ايداره لر بيري - بيرينين آردينجا اودا چکيلدي و يانديريلدي . اهالي دسته - دسته يولا دوشدو . شهر بوتونلوک له حرکته قاتيلدي . هر محله ده جاوان لار دسته -دسته خيابان لارا چيخيب ال لرينه کئچن هرنه ايله اولسون هيجوما باشلادي .

بازارين تعطيلي و ياس مراسيمي نين قورولماسي دوزدو کي سيد کاظيم شريعتمدارينين اعلانيله باشلادي ، لاکين اونو نلا ياناشي آپاريلان ايش داها بويوک ووسعت آلدي . سيد کاظيم شريعتمدارينين اعلاني قوم شهرينده بير نئچه طلبه نين اولدورولمه سينه ساده جه ائعتيراض ائديسه، يارانان حرکات ماهييت ائعتيباري ايله بوتون ليک ده شاه رئژيمي عليهنه باشلايان گئنيش عوصيان ايدي .

گون اورتادان سونرا شهر بوتووليکده اينقلابي قووه لرين ايختيارينا کئچميشدي . نظميه قوه لري قورخولاريندان عوصيان قالديران اهاليه ياخين دوشه بيليميردي . هردن اوزاقلاردان آتيلان آتش سس لري ائشيديليردي . گؤزه دين بويوک يانقين لار بير بالاجا کارتون يانديرماسي ايله يا بير کوهنه ماشين ته يرينين اود وورولماسيله باش وئريردي . بير بالاجا نفت يا خود بنزين اؤز ايشيني گوروردو . دوشمني حئسابا سالمايان اهالي ، بانگ لاردا پول دسته لرله اود تونقالي دوزه لتميش ديلر . بوتون يوخسول محله لرده ياشايان زحمت کشلر ، خالچا توخويان فهله لر ، باشماق چي لار ، جوراب توخوجو ايشچي لري ، هاميسي فعال صورتده بو عوصياندا ايشتراک ائديرديلر . تبريز دانيشگاهي و مکتبلرين طلبه لري هاميسي خيابان لار دا ، ميدان لاردا فعال صورت ده گورونوردولر . دانيشگاهين شيمال طرفيندن بير دسته تبريز راديو سونا طرف يولا دوشموشدو . باشقا - باشقا دسته لر شهرين آيري - آيري چوخ اهميتلي يئرلرينه طرف ، کلانتري لره طرف هيجوما باشلاميشديلار .

رئژيم ال آلتيلارينين باشچيسي ، اوستاندار شفقت بو وضعيتي گوروب تهران لا مصلحت لشيب ، تبريز اطرافي شهرلردن سيلاحلي قوه لري ييغيب تبريزه داخيل ائتدي .او قيام ائدن اهاليه تضييقي داهادا آرتيرماقي قارارا آلدي . آخشاما ياخين آرتشين خالقا هيجوموندان سونرا، وضعييت دئيشدي . عوصيان ايشتراک چي لاري مووقتي اولاراق گئري اوتوردولار .

29 بهمن ده اوز وئرن حرکات، ايستيبداد عليهنه چئويرليش ماهيتي ايله، بير ايل عرضينده ايرانين بوتون نوقطه لريني موباريزه ميدانينا چئويردي . ايندي يه قدر ائعتيراض فورماسي داشيان حرکات، بو نوقطه دن چئويريليش دوشونجه سيستيمي ايله دئيشيلدي . چئويريليش ماهيتي آنجاق و آنجاق 26 - بهمن حرکاتي ايله اؤنه چيخدي . بو عوصيانين تاکتيکاسي و ايره لي سوردويو شوعارلار آيري - آيري شهر لرده ده اوز عکسيني تاپدي . بير ايل چکمه دن، حرکات کوتله وي شه کيل آلدي و 1356 - نجي ايلين 29 - بهمنينده تبريز ده باشلايان حرکات هئچ شوبهه سيز کي 1357 - نجي ايلين 22 - بهمن اينقلابي ايله نتيجه لنده .

پهلوي حاکيميتي ييخيلديقدان سونرا ، ايسلام حاکيميتينين تبليقاتچي لاري آرتيق درجه ده چاليشديلار کي، تبريزين 29 - بهمن قياميني خومينينين طرف دار لارينين آدي له باغلاسين لار . اونلار خالقين شاه رئژيمينه قارشي نيفرتينين اساس سببينيني گيزلتمه يه چاليشديلار . اونلار آذربايجان خالقي نين سون 31 - ايل موباريزه سينين ذيروه سي 29 - بهمن اينقلابين نين ايل دونوملريني هئچ زامان قئيد ائتمه ديلر . بير سوز له ايسلام حاکيميتي ده شاه رئژيمي سياستيني آذربايجان اهاليسينه تطبيق اتمهٔ يه چاليشديلار . اونلار آذربايجان لي لارين ميلي حوقوق لارينين تاپدالاماقدا کوهنه سياستي تيکرار ائتدي لر .

بئله اولان حالدا وضعيتي اينجه له مک اوچون باشقا بير مساله ني ده قئيد ائتمک يئرينه دوشر . آذربايجان اهاليسي داخيلينده حتا ديني رهبر ده باشقا مساله لر کيمي ميلي شوعور تاثيري داخيلينده اينکشاف ائتميشدي . 1356 - نجي ايلين بهمن آيي حرکاتي دوورونده، آزاراق آذربايجان لي تاپماق اولاردي کي روح الله خومينيني تانيسين . اهالينين ديني مرجعي سيد کاظيم شريعتمداري يا خود نجف ده ياشايان ابوالقاسم خوئي ايدي و البته بوندا دا هئچ بير آذربايجانلي نين شوبهه سي يوخودي کي بو ايکي مرجع، پهلوي رئژيمي قارشيسيندا چوخ يوموشاق و مووافيق باخيملاري واريدي. بله ليک له آچيقلاماق اولار کي، آذربايجاندا ساده جه ائعتيراض پلانيني ماهييت ائعتيباريله چئويريليش حرکتينه تبديل ائتمک و رئژيمين قارشي سيندا دايانماق ، ديني ائعتيقاد ودين باشچيلارينين فرمان لارينين نتيجه سي دئيل دي. . ديکتاتورا رئژيمينين سيتون لاريني سينديران آنجاق و آنجاق عموم آذربايجان لي لارين رئژيمه قارشي اولان نيفرتي ايدي . ايللر بويو شووينيسمين رذيل سياستي آلتيندا ازيلميش ، ميلي ده ير لريندن محروم ائديلميش ، وارليغي اينکار اولونموش خالق، کوتله وي شه کيل ده عوصيانا باشلاميشدي .ائعتراض نيمايش لرينين باشلانغيجي دينچي بازار اهالي سي طرفيندن ايره لي سورولسه ده، موباريزه صحنه سينين ترکيبيني دئيشن ، رئژيمه قارشي چئويريش مؤوقئعينده دوران حرکات، بوغولموش و تالان اولموش ميلي ايستک لر و آرزو لاريدي کي عوصيان نتيجه سي کيمي اورتايا چيخميشدي .

پهلوي رئژيمي تبريز قيامينيني خارجه دن گه لن اينسانلارين آدينا باغلاماق ايسته ييردي . بونونلا باغلي تهران حيکومتينين بيرينجي خبري بو اولدو کي آذربايجا نين شيمال مرزيندن کئچن الي چوماقلي آدام لار بانگ لارا و دولت ايداره لره اود ووروب قاييديب لار . تبريز تراکتور سازي فهله سي ، شاعير ذولفيقار کمالي بو حاقدا اونلارابئله جاواب دييردي :

زولفعلي ايله ، اوروج علي

هاردان اولدو خارجه لي؟

تبريز لي اوزويدي - اوزو

بهمنين 29 - او